Residentenan contra parke di turbina Urirama a topa cu comision LAR

Say no to wind turbines at Urirama and Alto Vista ArubaA hala fecha operacional di Parke Urirama te comienso 2016, asina a ser publica den NoticiaCla awe. E proyecto di parke di molina na Urirama un biaha mas ta conoce retrasonan cu ta pone cu ta te fin di 2015, comienso di 2016 e lo por ta operacional. Casonan legal dilanti comision di LAR y tambe posibel casonan den corte mes por atrasa e proyecto mas ainda.


“Nos ta spera cu no”, Henk Hutting, director di e compania cu lo maneha e parke a bisa NoticiaCla.com diamars mainta. Riba dje gobierno ainda tin cu cuminsa cu e proceso pa cambia e plan di desaroyo espacial, (ROP), cu ta necesario pa pais Aruba por duna e tereno erfpacht na e compania. Tanten esey no sosode, no por cuminsa cu e trabou fisico.

Hutting splica NoticiaCla.com cu e la compronde cu proximamente esaki lo cuminsa porfin. “Esaki enberdad a keda atrasa debi cu e prioridadnan politico di gobierno tabata pa resolve e asunto di presupuesto”. Pero no ta asina cu e hecho cu e falta di firma presupuesto, a tarda e proceso. “Esey no tin nada di haber “ Hutting a sigura NoticiaCla.com pasobra firma e presupuesto of no, no ta afecta e proyecto. Mes momento Hutting ta confirma si cu e tardansa, a aumenta e costonan di e proyecto. “Un poco so, no hopi” Hutting a sigura NoticiaCla.com . Kico cu pasa, e ta keda mas barata cu procesa coriente pa medio di petrolio, segun e director a sigui splica.

Manera ta conoci, diabierna ultimo a trata 3 caso di protesta di ciudadanonan y grupo den dilanti comision di LAR. Falta 2 mas pa bin. “Si e hendenan aki bay corte despues tambe, e lo por tarda e proyecto mas ainda, dependiendo di e schedule di corte (pa trata e casonan)” Hutting a sigui bisa. Si no tin mas retraso, e ta spera cu pa mitar di otro aña (2015) por cuminsa cu e trabounan pa asina comienso di 2016 tin e parke operacional.

E parke di molina na Urirama tin cu bira e di dos parke di molina na Aruba, banda di esun existente na Vader Piet. Tur dos compania ta cay bou di maneho di mesun compania madre, pero cada un tin un diferente NV. Despues di a tende di comunidad su precupacion, a opta e ora pa ahusta e localidad di algun di e molinanan pa Urirama, pa no stroba e interferi cu e bista di e kapel di Alto Vista, na Urirama. Protesta di habitantenan den e region y mas alew a pone cu e proyeto a conoce retrasonan grandi. Problema cu ciudadanonan ta bin cune ta cu debi cu e proyecto por tin posibel efecto di malesa y reduccion di balor di tereno.

Publicacion original a sali ariba noticiacla.com 19 di augustus 2014.

Advertisements